A strega dumata - Guidu Benigni

A strega dumata - 40 pages, 5 €

Couv a strega dumata 1ere

Natu in lu 1931, l’autore hà vissutu a so prima zitellina una vita paisana trà San Martinu di Lota è Petralba è pullastrone in Aiacciu è Bastia. Dopu à vint’anni di segiorni culuniali a so passione per a cavallina l’hà permessu di percorre tutta l’isula utilizendu chjassi, senteri è viali trà i quali : Giru di Corsica in 35 ghjorni, in ‘81 - Traversata di a Corsica Bunifaziu-Bastia, 21 ghjorni in ‘86. A so brama di scrittura hè venuta dopu è hè stata ricumpensata da molti premii. Militante culturale in parte di u mondu assuciativu Balaninu è à prò di a lingua corsa.

EXTRAIT - Prulogu

Prulogu

Scena prima

(Fora, da nanzu à una cantina, à l'insegna "Cantina *** NN"

Affacca a Patrona Memmetta, detta "Mezetta", à spazzula pisata apressu à Antone "Vulpinu".)

   Memmetta : Sorti mi di trampula ! o briacò !

   Vulpinu : Ch'acceghi puru, sborgna cum’è questa... (Hips) inde Mezetta ! Umbbè ! Chì guazza !

   Memmetta : Via, via ! Fora !

   Vulpinu : Sì una rubbaccia, a sai (Hips) o Mezè. Ùn ai nisuna pietà ! Sappia chì ancu i briaconi facenu partita di (Hips) a sucietà di cunsumazione. Dunque participanti di l'ecunumia lucale. Senza cuntà (Hips) chì noi simu i meglior clienti di e cantine, ùn n'hè vè?

   Memmetta : Ié, à cundizione di pagà i vostri bichjeri !

   Vulpinu : Ùn ci cuntà puru, o Mezè, (Hips) Ghjur'lu San Friscanu ! Dopu à u to trattamentu à spazzulate fattu à un onestu cunsumatore cum'è mè. Ti poi puru (Hips) grattà duve pensu eiu !

   Memmetta : Han ié ? Ebbè, anderaghju à circà i giandarmi. (Sorte)

   Vulpinu : I giandarmi ? Venghi puru (Hips) ancu u Presidente di a Republica cù u Primu Ministru ! L'aspettu... ch'elli venganu puru tutti,... (Hips) ma senza fà rimore chì aghju una pena in capu, (Hips) chì schiattu. (Casca in pianu, à meza scena, è s'addurmenta à l'istante)

(Entrenu dui giandarmi cù u Merre)

   U Merre : Torna ! Stù briacunacciu di Vulpinu ? O Chef, mettite mi lu in carciula, heu... mettez-le moi à l'ombre. È ch'è ùn vega più quì, à mezu a piazza, stù vergugnusacciu.

   U Sceffu : Allez, Vulpinó, mouvez-vous di quì, heu... Gendarme, faites exécuter, et que çà saute !

   U Giandarme : (Dendu un calciu à Vulpinu) Aió, o Vulpì, muvimu ci di quì !

   Vulpinu : È u Presidente Macron, induve hè ? (Hips) Chì li n'aghju da cantà duie.

   U Giandarme : Viaghja ! Li scriverai quand'è tù serai in prigiò. En avant, marche !

   Vulpinu : En marche ! è in prigiò cum’è aghju da fà la a "marche" ? È ch'aghju fattu (Hips) per andà in prigiò ?

   U Merre : U scandalu. Cum'è di solitu.

   Vulpinu : State à sente, o Sgiò Merre, ch'ella sia (Hips) ben capita. S'è voi mi fate ficcà in prigiò, palesu tuttu ciò chì sò di l'affare.

   U Merre : O ma fà la finita ! O briacò ! È di chì affare voli parlà ?

   Vulpinu : U vostru, l'affare. (Vulpinu parla à l'arechja di u Merre) Hahan ! Cridiate chè ùn la sapè si, eiu ? Ebbè, (Hips) sò à u fattu di u vostru affare, da u principiu à a fine. Bellu bruttu, quessu l'affare, chè? È contu palisà tuttu (Hips) à u Sceffu di a giandarmeria.

   U Merre : Bonu, bonu. (À u Sceffu) Và bè, và bè ! Per stà volta, lascemu corre.

(Sortenu i giandarmi, butulendu)

   U Merre : A noi tocca ! Chì ne sai pò di st'affare ?

   Vulpinu : A sapete, o Sgiò Merre. (Hips) Ùn fate u niscentre.

   U Merre : Vogliu sapè ciò chè tù sai.

   Vulpinu : Ciò ch'eiu sò, hè ciò chì voi (Hips) ne sapete. Vistu ch'ellu hè u vostru l'affare.

   U Merre : Torna à Vignale ! Ma chì hè st'affare ?

   Vulpinu : Un affaracciu ! Chì s'ellu si sapessi... (Hips) Disgraziata a sciarpa, u sucellu è a merria !

(Sottu voce, à l'arechja di u Merre li dice qualcosa)

   U Merre : (Addulcitu) O Vulpì. Sai chì sò sempre statu un amicu di u to corciu di Babbu ? Sai chì ellu hè sempre statu di u nostru partitu è ch'ellu m'hà sempre datu u so votu ? Ùn

femu chjachjare ! Trà di noi, mai ch'ellu ci sia qualunque malintesa. Bonu. Và bè, una piccula sburgnarella di quandu in quandu, ùn face male. A ti cuncedu. Ma, acqua in bocca, ùn n'hè vè ?

   Vulpinu : S'ella m'era data a sceglie (Hips) à a piazza di l'acqua in bocca ne serebbe primurosu di mette ci un vinu chjarasginu di sottu scala, chè o Sgiò Merre ?

   U Merre : Hè detta. Feremu cusì.

   Vulpinu : Eccu ci, un ragiunamentu assensatu. Voi altri, (Hips) omi pulitichi, à sapete cum'è dì si dè. Aiò, o Sgiò Merre, à un di stì ghjorni, (Hips) vi salutu. (Sorte)

   U Merre : Ch'ellu scià cecu, stù Vulpinacciu, sà duve u diavule ficca a coda ! (Sorte)

 

Aucune note. Soyez le premier à attribuer une note !

Ajouter un commentaire
 

Date de dernière mise à jour : 19/07/2019