Di l'alma à la rima - Letizia Cosimi

Di l'alma à la rima - 106 pages, 12€

 

 

 

Couv 1ere da l alma a la rima icn

 

 

Quandu si piglia u filu di e puesie di Letizia Cosimi ùn si leghje micca, si seguita un ruscellu cristallinu chì corre è face risorge ùn sò quante musiche, ùn sò quanti ramenti, ùn sò quanti ritratti, unu più piacevule chè l’altru. Ch’ellu si tratti di a terra, di l’omu, di i sentimenti, omu si ritrova ammagatu è cummossu, avviatu verdi e delizie chì solu i veri pueti sanu fà nasce è fiurisce. I versi di Letizia sò quelli chì aprenu l’orizonti mai avventati, i spazii infiniti, i celi sereni induve u spiritu di a nostra lingua materna corre à fiatu scioltu…

 

 

 

 

 

 

 

EXTRAIT 1 - Da quassù - page 11

Quandu l’alma hè capace per una stonda di francà l’ultima cunfina…

Da quassù

Vecu lu mare da quallà

Ogni partenza è ogni vultà

È po vecu dinù

Ciò ch’ellu hè quassù

Ma ciò chì fù

 

Ciò chì ne firmerà ?

Li passi à smenticà

E gioie in più

E disgrazie insù

È po, la mio ghjuventù

 

Ci so i ricordi è una libertà

Un altru curagiu per andà

Stonde di virtù

Mumenti di più

L’ultimu viaghju in schjavitù

 

I sonnii andati è quelli à inventà

Certi diventanu rialità

È l’amore chì fù

Una volta è po più

 Un basgiu d’amore ch’è tù sai tù...

 

 

EXTRAIT 2 - L'eternu addiu - page 21

Per una terra, una lingua, un populu, tamant’omu…

L’eternu addiu

À la to lotta arradicata

Chì dà fretu in lu spinu

À la to parolla zuccata

Chì mai serà in ruina

 

À la to piuma incastrata

Puntellu d’ogni matina

U Riacquistu ammaestratu

Di la to penna cristallina

 

È ‘ssu tavulone frisgiatu

Di lu to versu fiuritu

Lu so lamentu infiaratu

Si mantene una cria

 

Una canzona mai scurdata

È sputica cù la to lingua

Oghje l’inchjostru hè spaventatu

È pienghje la mio mina

 

In u quaternu abbandunatu

Di lu to gestu matutinu

Lu to ricordu zuccatu

Inde a strada zitellina

 

À lu to passu stampatu

Chì ferma in la mio rima

Nant’un fogliu disturbatu

Lu to talentu sempre in cima…

 

À Ghjuvan Teramu Rocchi

Aucune note. Soyez le premier à attribuer une note !

Ajouter un commentaire
 

Date de dernière mise à jour : 18/07/2019