San Liseu - Guidu Benigni

San Liseu - 232 pages, 17€

Couv san liseu 1ere

Ne averà intesu raconti è stalvatoghji, u zitellu oghjincu ?

Si vene per dì quelli praticati à scornu di fucone, cuntati da un vechjacone barbibiancu, ochji mezi spenti è voce arghita. Di quelli raconti fatti di motti scalpellati, pruverbi, spressione ripetute cum’è pregantule, incantesimi di parolle chì parlanu d’una vita landana, di fatti è di fole, di burle è di macagne, di ramenti è chì sò stati mastucati dapoi sempre è passati da vechju à zitellu. N’averà intesu, sì o nò ? S’ella hè nò, hè chì li manca è li mancherà qualcosa per custruisce a so vita d’omu. Più tardi, bellu più tardi, quandu per amparà, serà troppu tardi… chì ne penserà d’issa mancanza ?

L’autore ci avia digià, anni passati, datu una racolta di Favule (Premiu di i lettori - 2011), ma eccu ch’ellu hè passatu sta volta à una ammansata ch’ellu hà arrughjunatu in un paese miticu : San Liseu. Ci si ritrova una cinquantina di paisani d’issu rughjone, mischiati in le so vicende è ancu in li puttachji è e macagne chì l’autore hà travestuti, sviati o inventati è chì vanu da u veritativu à l’imaginariu, da i miti à e cridanze, da a fantasia à u seriu è qualchì volta ancu un suppulu à u scherzu è à u scrianzatisimu. Ma lascemu corre, a primura hè di passà una stonda à u pede di u fucone in cumpagnia d’un mondu chì, no solu ùn esiste più, ma chì di sicuru ùn rivenerà mai più.

 

EXTRAIT 1 - Nota di l'autore - page 7

Nota di l’autore

Si sà chì per ognunu di noi altri corsi, dettu "u mio paese", rivene à dì ch’ellu hè u più bellu di tutta a Corsica. Hè cusì, ùn vale à circà à discore. A causa hè ghjusta è basta. Ma cum’è tutti i paesi s’assumiglianu più o menu (for di quelli chì piglianu una sumiglia purtroppu "village de vacances", iscia !), si pò ancu aghjustà chì ciò chì si passa quì pò accade altrò in Cismonte o in Pumonte. Si pò dì chì tale fattu stranu, chì tale disgrazia, chì qualchì terramotu, chì una certa macagna o una subbitania furtuna, sò tutte cose chì ponu succede in un qualunque rughjone.

Hè cusì chì à filu di l’anni, i fatti stalvati o nò, inventati o micca è chì unu apressu à l’altru s’accuzzuleghjanu, per risultatu di fà nasce una cumpilazione chì, meritata o nò, finisce per sbuccià in una seguita di raconti. Ci vole à crede chì u galateu è u spiritu nustrale di a nostra ruralità ci sò per qualcosa, ancu s’è certe critiche volenu dì chì noi altri corsi avemu pocu estru spiritosu o umuristicu sia. À quessi i lasceremu grachjà vistu chì noi avemu a nostra a manera di ciarlà, di ride, di burlà, di macagnà, di scherzighjà, di taruccà, di stuzzicà, di zircà, d’azzizzà o di cianfugnà (si vede benissimu chì di termini ùn si ne manca), è chì s’elli ùn la ponu cuncepisce tale ch’ella hè, tantu peghju per elli corci, à noi ci cunvene è piace.

Dunque passeremu à dà un ochju à issu paese ch’ellu m’hè piaciutu di battizà San Liseu, vistu chì in Corsica ùn si ne cunnosce d’issu nome, è po ancu s’ellu pudia esiste, beatu seria statu essendu chì l’amministrati di u Sgiò Merre Sucelli si presentanu in lu listinu quì apressu è ch’elli v’invitanu à passà una stundarella cun elli, senza ceremonie è in tutta amicizia.

Siate dunque i benvenuti in San Liseu.

San Liseu, ottobre 2018.

EXTRAIT 2 - Prefaziu di Ghjacumu Thiers - page 9

Fucone sì ma literariu

Una settantina di scritti ind’è stu libru novu di l’amicu Guidu !

Hè vera chì, vistu ch’ellu ci hà portu una trentina di publicazione in pochi anni, hà avvizzatu u lettore corsu à una pruduzzione diviziosa è varia di forme, cuntenuti è generi. È ad incurunà tutta issa pruduzzione ricca, ammanita è viva vene sempre listessu versu di a dicitura : sputichezza è naturale, senza sforzu, nè purisimu custrettu è azezu.

Ma ùn ci spiccemu di cunfonde naturale, spuntaneità è ... mancanza di ricerca o prufundità.

Di fatti, videndu cum’ella hè caratterizata a robba ch’ellu scrive Guidu Benigni, i tituli ch’ellu ci appiccica ellu u primu, si puderia pensà di infattà affari fora di a vita attuale, ramenti solu nustalgichi di una sucetà bella chè passata. Degna di piantu è di ramaricu è basta.

Ma saria un bellu sbagliu. Di fatti ùn ci fidemu di a figliazione “fola, racontu, stalvatoghju, macagna, puttachju” è tira avanti.

Hà modu à ammintà li ancu ellu pè i 74 scritti impustati quì in un paese “miticu” San Liseu. À invità ci à ”passà una stonda à u pede di u fucone in cumpagnia d’un mondu chì, non solu ùn esiste più, ma chì di sicuru ùn rivenerà mai più”.

Isse cridanze, issi miti ùn sò un universu mortu. Passatu sì è miticu d’accordu. Ma l’imaginariu hè d’oghje perchè chì hè literariu, è a literatura, nata ch’ella hè ùn more.

È tandu, s’è no l’avemu sfuglittata troppu in furia sta racolta di... testi literarii, turnemu à campà ci cun isse 74 piccule prose chì tutte tutte ci portanu una nuvità, pè u più in a so chjusura à l’usu di un racontu ma altre volte di una cronaca giurnalistica, di un fattu stalvatu sì, ma micca aggrancatu da stalvatoghju, di una muralità spessu murale pocu o mancu à pena !

È tandu forse ci accurghjeremu ch’è no simu ghjuntu à pusà à u pede di un fucone, ma unu uriginale assai, è mancu à pena passatu. U fucone di a Literatura. Una scrittura chì luce, ride è porta à pensà. È in issu San Liseu imaginariu, u patrone chì l’hà creatu, nantu à a vita di sempre porghje lume, spiritu è irunia da fà prò !

Ghjacumu Thiers

EXTRAIT 3 - Filiciola è Ghjasippellu - page 27

Filiciola è Ghjasippellu.

Di Filiciola ne fù cuntatu u fattu da Zia Battistina, detta Paris-Presse chì ella per a ducumentazione ne sapia più chè l’Internet. D’issa storia, vera o stalvatoghju, nisunu for d’ella a sapia cun certezza. A donna avia issa riputazione d’agenzia infurmatica chì l’avia fattu appiccicà issu bellu cugnome ch’ella ripresentava d’incanti. Ma dapoi circa più di un seculu fà, omu ùn sapia s’ella fù veramente vissuta o chè. Nunda di stupente in un San Liseu induve e vuciate, i puttachji è e cianfogne currianu più prestu chè oghje cù u finestrinu di a television.

Di a parentia d’issa Filiciola ùn si ne sapia dì qualessa è ne menu a casata. Solu u so nome era restatu impressu.

À sente à Zia Battistina Paris-Presse, a famiglia di Filiciola stava in una casarella scantata da u paese induve i parenti facianu leva capruna per fà casgiu da vende è in sopra à più capretti per e feste natalesche. Per accuncià u cibbu pustimavanu un urticellu. Un purcellu à ingrassà è un pullinaghju cumplettavanu a ricchezza di casa.

Unica figliola, Filiciola aiutava i parenti per l’ortaglia, locu induve ella a si facia valè. Or fà chì tutti i ghjorni ella vidia passà un giuvanottu chjamatu Ghjasippellu. Questu, andava in fiuminale à dà a manu à u babbu, Salvadore, chì facia da mulinaghju. Cù u so sumerellu carcu di granu a matina è di sacchi di farina a sera, Ghjasippellu facia u passa è veni duie volte da nanzu à l’ortu di Filiciola. A matina, ella cugliia fasgioli, pumate è zucchini è a sera annacquava i so solchi. 

È ogni volta ùn mancavanu di lampà si quella ochjata. Ma senza mai osà u minimu gestu o parolla.

Fù u ghjornu di a festa di u paese, quandu i cunfratelli surtianu u Santu in prucessiò, ch’elli si sò truvati quasi à tocca tocca è ch’elli si sò parlati ma solu cun l’ochji. È da tandu s’eranu prumessi. In un longu longu è segretu discorsu chì purtantu ùn avia duratu chè una minuta. Da issu ghjornu Filiciola è Ghjasippellu, di passata mane è sera, in più di l’ochjata, si facianu un surrisu, scusa di mantene viva a prumessa.

U paese, d’issi tempi di u Secondu Imperu, era sottumessu, si pò dì cusì, à u Sgiò Nistoru chì, à e funzione di merre aghjustava quelle di ghjudice di pace. Ciò chì facia d’ellu una spezia d’auturità supreme cù a quale ùn valia à scumpete. È ellu, soca per marcà u so putere, ùn mancava una occasione di fà pate trafarii, offese è inghjulie à tutta persona chì li venia in traversu. U so figliolu Anselmu, un picculu merdusellu di diciott’anni, pienu di pretensione, cun pretesa di u babbu, ne prufittava per impone i so capricci è ne facia vede di quelle scughjate à e povare ghjente chì ùn ansciavanu di paura di mette si à male cun l’autorità ghjudiziale.

È un ghjornu, Anselmu a s’avia pigliata cun Ghjasippellu per via chì questu ùn l’avia salutatu chè d’un cennu di capu. L’usu essendu di pisà baretta o cappellu da nanzu à i sgiò.

Un bellu ghjornu, ùn s’era sappiutu nè perchè nè da quale, u madrale di l’acqua mulinaghja era statu rottu da manu d’omu, mettendu à male a macinata. U tempu di rifà e mure à calcina è rimette in sesta l’acquidottu, ci volsenu trè ghjurnate sane è a perdita di u mulinaghju fù cunseguente. Fù cunsigliatu da a parentia di subbisce è stà si zittu, ma Salvadore u mulinaghju, sicuru d’avè ragiò è chì u disguastu era statu vuluntariu, ùn avia vulsutu sente nunda. Avia mossu lagnanza.

U ghjornu di a seduta, u Sgiò ghjudice Nistoru avia dettu chì ùn ci era culpevule presente è chì quessi i fatti eranu cunsiderati naturali è sugetti à i madrali frusti da l’anni. Ma l’affare ùn finì cusì è si sciolse quandu Anselmu à l’esciuta di seduta s’intuppò cun Ghjasippellu. Ci nascinu i colpi è u mulinaghju chì s’era interpostu in quellu para è teni per spiccà l’azzuffu, s’avia pescu una stilittata chì l’occise.

À u prucessu in Bastia, l’avucatu avia difesu à Anselmu, solu suspettu palisatu da Ghjasippellu, ma cum’ellu ùn s’era truvatu un solu testimone chì avessi vistu è pruvatu a colpa di u so cliente, Anselmu fù assoltu è rimessu in libertà.  

Dui ghjorni dopu, era dumenica. Ghjasippellu, in cor di matina, s’era piantatu à l’arice di l’ortu è cun Filiciola in lagrime s’eranu turnati à fighjà una bella stonda, senza anscià una parolla. Dopu u giuvanottu era affaccatu in piazza induve l’omi eranu in bivetta è attavulinatu cù elli Anselmu. Ghjasippellu avia surtitu u rivolveru è sbattutu à Anselmu cun sei palle in capu.

À u prucessu, torna in Bastia, u Prucuratore Generale dumandò a pena capitale ma i giurati ùn lu seguitonu, cundannendu à Ghjasippellu à perpetuità. Fù mandatu à e carcere di Caiena.

Da issu ghjornu a vechja mamma di Ghjasippellu fù pigliata in casa da Filiciola chi a currò cum’è s’ella fussi a soia.

*****

Sò passati un si sà quant’anni. Filiciola rifiutò tutti i pretendenti è si restò figlia ancu dopu ch’elli morsenu i so parenti è a vechja mamma di Ghjasippellu.

Scadutu l’Imperu, rinata a Republica, l’amnistia per certi cundannati vutata, un bellu ghjornu a grazia fù ottenuta per Ghjasippellu chì si ne righjunse in paese.

À aspettà lu, Filiciola, senza una parolla ma cù e lagrime di a cuntentezza, l’avia abbracciatu è infine, avianu pussutu rializà a prumessa fatta cun l’ochji è s’eranu maritati.

 

Aucune note. Soyez le premier à attribuer une note !

Ajouter un commentaire
 

Date de dernière mise à jour : 18/07/2019